កំពត៖ ស្នងការដ្ឋាននគរបាលខេត្តកំពត លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានបញ្ជាក់ប្រាប់ EAC តាមទូរសព្ទថា គិតមកដល់ពេលនេះអាជ្ញាធរកំពុងតែស្វះស្វែងរកជនរងគ្រោះចំនួន ១នាក់ទៀតក្នុងចំណោមជនរងគ្រោះចំនួន ៣នាក់ដែលត្រូវបានទឹកជ្រោះហូរគួចយកទៅក្នុងអំឡុងពួកគេបោះតង់គេងកាលពីយប់ឈានចូលថ្ងៃទី៣០ ខែកក្កដា ឆ្នាំ២០២៣។

លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានប្រាប់ឱ្យដឹងថា មកដល់រសៀលនេះអាជ្ញាធរបានរកឃើញសាកសពជនរងគ្រោះភេទស្រីម្នាក់ ហើយបានជួយសង្រ្គោះជនរងគ្រោះភេទប្រុសម្នាក់ប្រកបដោយសុវត្ថិភាព ខណៈអាជ្ញាធរកំពុងបន្តស្វែងរកសាកសពជនរងគ្រោះភេទស្រីម្នាក់ទៀតដែលត្រូវបានទឹកហូរគួចយកទៅ។

បើតាមលោកស្នងការដ្ឋាននគរបាលខេត្តកំពត ជនរងគ្រោះបានទៅបោះតង់នៅរមណីយដ្ឋានទឹកជ្រោះឱម៉ាល់ជាមួយនឹងគ្នាចំនួន ៥៣នាក់ ដោយឡែកជនរងគ្រោះបានទៅបោះតង់នៅចំផ្លូវទឹកជ្រោះហូរ ខណៈកាលពីយប់មិញនៅវេលាម៉ោង៣យប់មានភ្លៀងធ្លាក់ខ្លាំង ទើបបណ្តាលឱ្យទឹកហូរគួចយកជនរងគ្រោះទៅដោយទាំងតង់តែម្តង។

លោកឧត្តមសេនីយ៍ទោ បានបញ្ជាក់ថា គិតមកដល់ពេលនេះអាជ្ញាធរបានជួយជម្លៀសអ្នកទេសចរជាង ៥០នាក់ចេញពីទឹកជ្រោះឱម៉ាល់ទៅកន្លែងមានសុវត្ថិភាពហើយ។

លោកបានអំពាវនាវដល់ភ្ញៀវទេសចរផ្អាកការមកបោះតង់លើជ្រោះឱមាល់ ពោលចាំពេលអាកាសធាតុល្អប្រសើរសិន៕